Newyddion Gorffennaf

Newyddion Mai

Newyddion Mawrth

Llythyr i rieni Mawrth 27ain: CANOLFAN OFAL HENBLAS

Ar ddiwedd yr wythnos rwyf yn ysgrifennu atoch yn y gobaith eich bod i gyd yn cadw’n ddiogel ac yn iach.

Mae wedi bod yn wythnos ryfedd iawn yn Ysgol Henblas – nid ysgol yw hi bellach wrth gwrs ond canolfan ofal. Dydi’r adeilad ddim yr un peth heb y plant ac rydym yn gweld eu colli yn arw. Rwyf hefyd yn siwr fod trigolion Llangristiolus a’r ardal gyfagos yn ei gweld hi’n dawel heb swn hapus a bwrlwm y plant ar yr iard.

Cliciwch yma i ddarllen y llythyr gyflawn (pdf)

Mrs Williams a Ted

Dyma lun i godi calon. Mae Ted Arthur yn werth ei weld, a’i fam wrth gwrs. Rydym i gyd yn anfon ein cofion atoch Mrs Williams a’r teulu, ac yn edrych ymlaen at eich gweld yn fuan.

Beth i’w wneud yn y cartref?

Os ydach chi awydd rhai syniadau i’w gwneud yn y cartref gwyliwch fideo Ifan!

Pennod 2 - cliciwch yma

Pennod 3 - cliciwch yma

Pennod 4 - cliciwch yma

Cydymdeimlo

Ar ddiwedd mis Mawrth daeth y newyddion trist i’n sylw fod Mrs Rhian Khardani wedi marw yn dilyn brwydr anodd â chancr. Rhian oedd clerc ein corff llywodraethol ers pedair blynedd. Roedd ganddi hiwmor iach ac fe fyddai ei chwerthiniad yn llenwi ein cyfarfodydd! Doedd dim byd yn ormod o drafferth iddi, ac roedd yn bleser cydweithio efo hi. Roedd yn un dda am gadw trefn arnom ni gyd yn ein cyfarfodydd!

Roedd gan Rhian feddwl mawr o Ysgol Henblas. Byddai bob tro yn ymfalchio yn llwyddiant ein plant, ac yn cysylltu’n rheolaidd i’w llongyfarch. Yn ogystal, roedd ganddi gyswllt teuluol – yn fodryb i Efa Lois. Doedd ond ychydig wythnosau ers i Rhian golli ei brawd.

Rydym yn cydymdeimlo’n ddwys gyda’i gwr Ali, yn ogystal ag Elen, Michael ac Efa ar eu colled greulon. Efallai ein bod i gyd arwahan ar hyn o bryd ond rydym yn agos wrth yrru ein cofion cynhesaf at y teulu.

Braint oedd cael ei hadnabod.

Rygbi Cyfeillgar

Bu tîm rygbi Ysgol Henblas yn chwarae yn erbyn Ysgol Llanfairpwll ddechrau’r mis. Diolch iddynt am ddod draw. Cafwyd pnawn da o gemau a thaclo brwd. Da iawn bawb a diolch i Michael Coyne am eu hyfforddi.

Cliciwch yma i weld fwy o luniau.

Siop ffrwythau blwyddyn 3 a 4

Bu siop ffrwythau ar agor yn nosbarth blwyddyn 3 a 4 - yn hybu dealltwriaeth o drin arian. Dyna dda yw gweld plant Ysgol Henblas yn bwyta’n iach!

Cliciwch yma i weld fwy o luniau.

Ffens newydd a phlannu tatws

Diolch i’r Gymdeithas Rhieni Athrawon am gyfrannu tuag at gostau y ffens newydd o gylch yr ardd. Mae’n edrych yn wych.

Bu holl plant yr ysgol yn plannu tatws efo Mike a Kirsty. Bydd cnwd da erbyn y ffair haf!

Cliciwch yma i weld fwy o luniau.

Canu i godi calon

Dyma ein plant yn morio canu ‘Mam wnaeth got imi’. Mwynhewch.

Eisteddfod yr Urdd

Rydym yn falch iawn o lwyddiannau pawb yn yr eisteddfod cylch Urdd gynhaliwyd ddiwedd Chwefror. Roedd pawb yn rhoi o’u gorau. Gwych iawn. Diolch i Elen ac Eirian am eu paratoi mor drylwyr.

Wythnos Gwyl Dewi

Yn ystod wythnos Gwyl Ddewi 2020 bu holl ddisgyblion yr ysgol yn cymryd rhan mewn gwahanol weithgareddau i ddathlu ein Cymreictod a'n diwylliant.

Cliciwch yma i weld fwy o luniau wythnos Gwyl Dewi.

Cacennau cri

Ar ol cyfnod o goginio gyda Mrs Owen ac Anti Nia mae plant blwyddyn 1 a 2 yn feistri ar greu cacennau cri.

Cliciwch yma i weld y lluniau.

Rygbi tag

Cafodd tîm rygbi bl3 a 4 a thîm bl 5 a 6 fore campus yng ngwyl rygbi tag Gwyl Ddewi. Llwyddodd y tîm bl 3 a 4 i guro pob gem ac fe gurodd tîm bl 5 a 6 bedair allan o 5 gem. Roedd yr hyfforddwr Mike Coyne yn hapus.

Dawnsio Gwerin

Dyma’r dosbarth derbyn yn dawnsio gwerin yn egniol yn eu gwisg ar gyfer diwrnod y llyfr!

Coginio

Cynhaliwyd cystadleuaeth coginio Wythnos Gwyl Dewi a bu’r cogyddion yn brysur! Cafodd Anti Sian ac Anti Aloma wledd wrth flasu a beirniadu! Da iawn bawb.

Cacennau cri: 1af Ceri a Harri
Bara brith: 1af Lili
Taffi triog 1af: Jacob bl0

Gorymdaith Gwyl Dewi

Bu disgyblion blwyddyn 5 a 6 yn gorymdeithio gyda’u ffrindiau o Ysgolion y dalgylch drwy stryd fawr Llangefni. Buont yn gwrando ar Arfon Wyn yn canu cyn mwynhau disgo yn yr ysgol uwchradd.

Cystadleuaeth Barddoniaeth

Bu rhai o ddisgyblion yr ysgol yn cystadlu mewn cystadleuaeth ysgrifennu barddoniaeth Gwyl Ddewi ar gyfer Ysgolion y dalgylch. Llongyfarchiadau i Casi (bl 3) ddaeth yn 2il drwy’r dalgylch am ysgrifennu barddoniaeth ar y thema Cymru, ac i Bedwyr (bl6) ddaeth yn 2il am ysgrifennu barddoniaeth ar y thema Dewi Sant.

Cliciwch yma i weld Barddoniaeth Casi

Cliciwch yma i weld Barddoniaeth Bedwyr

Huw Roberts a Bethan Roberts – Telyn a Chrwth

Cafodd disyblion blwyddyn 5 a 6 fore hyfryd yng nghwmni Huw a Bethan Roberts yn dysgu am offerynnau traddodiadol Cymru a’r wisg Gymreig, yn ogystal a chanu a dawnsio gwerin!

Cliciwch yma i weld y lluniau ar Flickr.

Diwrnod y llyfr

Ar ddiwrnod y llyfr bu disgyblion blwyddyn 5 a 6 yn darllen i blant y dosbarth derbyn. Gwych iawn oedd y rhyngweithio.

Newyddion Chwefror

Llwyddiant peldroed

Mae wedi bod yn fis prysur i’n timau peldroed. Rydym wedi croesawu timau o Ysgolion Bodffordd, Llangoed a Rhoscolyn yma ac wedi cael gemau da. Aeth tri tim peldroed 5 bob ochr i gystadlu yn y gystadleuaeth i Ysgolion y dalgylch ac fe aeth dau dim drwodd i’r rownd gynderfynol ac un i’r ffeinal cyn colli mewn gem agos. Yna aeth un tîm i Gaergybi lle daethant yn drydydd trwy’r Ynys gan guro pob gem yn y grwp a cholli i’r buddugwyr yn y rownd gynderfynol cyn curo’r gem trydydd safle. Diolch i Barry am eu hyfforddi eto.

Llwyddiant gymnasteg

Llongyfarchiadau i’r grwp gymnasteg sef Ariana, Gwen, Erin, Ioan, Mari ac Ifan ddaeth yn seithfed allan o 15 trwy Gymru gyfan. Roedd eu perfformiad yn gaboledig ac fe lwyddont i berfformio i’r safon y buont yn ymarfer mor galed at ei gyrraedd. Diolch i Mair,Ruth a Mrs Owen am eu hyfforddi. Llongyfarchiadau mawr hefyd i Cai – ddaeth yn bencampwr gymnasteg a sydd nawr yn mynd ymlaen i’r rownd nesaf yn Y Bala ym mis Mawrth.

Ffarwel am y tro

Pob hwyl i Mrs Williams sydd wedi ein gadael am gyfnod mamolaeth! Llongyfarchiadau mawr ar enedigaeth Ted Arthur a dymuniadau da i chi fel teulu! Croesawn Miss Bethan Owen atom at ddisgyblion blwyddyn 3 a 4 – mae Miss Owen a’r disgyblion newydd fwynhau eu wythnos gyntaf yn y dosbarth a’r wythnos wedi gwibio heibio!

Clwb ffitrwydd

Rydym yn ddiolchgar am yr holl glybiau sydd yn Ysgol Henblas ar ol 3:15pm. Mae’r clybiau Urdd, rygbi a phel droed yn mynd o nerth i nerth. Yn ddiweddar mae dau glwb newydd wedi dechrau sef dawnsio gyda Katie Jones i’r adran iau a ffitrwydd i blant y cyfnod Sylfaen gyda Mrs Clare Owen. Maent yn egniol iawn ac yn mwynhau yn fawr.

Mr Wil Rowlands

Diolch i’r arlunydd Wil Rowlands am sesiwn difyr yn sôn am gelf gyda disgyblion blwyddyn 5 a 6. Cawsom gyflwyniad difyr iawn am ‘popart’ac roedd y gwaith byrfyfyr wedi plesio’n arw hefyd!

Chroesawu Mrs Bethan Jones i Ysgol Henblas

Ffrind arall yr ydym wrth ein boddau yn ei chroesawu i Ysgol Henblas yw Mrs Bethan Jones. Rydym yn gyfarwydd a llais Mrs Jones ar raglen Galwad Cynnar ar Radio Cymru. Fe fu plant y cyfnod Sylfaen yn dysgu am wahanol goed a phlanhigion fel rhan o’u gwaith thema ac roeddent wedi dysgu llawer.

Dydd Miwsisg Cymru

Cafodd disgyblion yr adra iau fore arbennig yn Ysgol Llangefni gyda’u ffrindiau o ysgolion y dalgylch yn dathlu Dydd Miwsig Cymru. Diolch i Arfon Wyn am yr holl ganu a da oedd gweld bandiau ifanc Môn yn cael y cyfle.

Newyddion Ionawr

Gala nofio

Bu cryn dipyn o ddisgyblion yn cymryd rhan yng ngala nofio’r Urdd. Daeth llawer o lwyddiannau i’w rhan a llongyfarchiadau i aelodau’r ras gyfnewid blwyddyn 3 a 4 ddaeth i’r brig sef Erin Quinn, Ela Edwards, Efa Lois ac Efa Torr. Yn ogystal aeth Erin yr holl ffordd i Gaerdydd i gystadlu yn unigol gan ddod yn bedwerydd a phumed drwy Gymru. Tipyn o gamp!

Cylch Meithrin Henblas

Rydym wrth ein boddau fod y cylch meithrin wedi ail agor y mis hwn. Cafwyd bore arbennig i lansio’r cyfnod newydd pan ddaeth Hanna Huws a Selog draw i gyfarfod y plant. Dymuniadau gorau i bawb ynghlwm a’r cyfnod newydd hwn a diolch i’r pwyllgor gweithgar am sicrhau fod y cylch wedi agor eu drysau eto.

Gymnasteg

Llongyfarchiadau mawr i’r criw gymansteg fu’n cystadlu yng nghystadleuaeth Urdd y sir. Cafwyd llwyddiannau lu - y grwp yn gyntaf, y triawd yn ail a’r parau yn drydydd. Diolch i Mair, Ruth a Mrs Owen am eu hyfforddi a dymuniadau gorau i’r grwp – sef Ifan Gilford, Ioan Coyne, Erin Quinn, Ariana Hardy, Mari Roberts a Gwen Coyne yn Aberystwyth.

Cylch Meithrin Henblas

Rydym wrth ein boddau fod y cylch meithrin wedi ail agor y mis hwn. Cafwyd bore arbennig i lansio’r cyfnod newydd pan ddaeth Hanna Huws a Selog draw i gyfarfod y plant. Dymuniadau gorau i bawb ynghlwm a’r cyfnod newydd hwn a diolch i’r pwyllgor gweithgar am sicrhau fod y cylch wedi agor eu drysau eto.

Cyfnod y Nadolig

Wel son am bobl dalentog sydd yn Llangristiolus. Nos Sul cyn y Nadolig cafwyd cyngerdd gan gyn ddisgyblion, rhieni, a’n disgyblion presennol. Diolch i’r côr am ganu mor frwdfrydig ac i bawb am gefnogi. Aeth disgyblion blwyddyn 6 i gartref Rhos, Malltraeth. Roedd gwrando arnynt yn siarad mor aeddfed gyda thrigolion y cartref yn brofiad arbennig. Diolch i Ann a’r staff am y croeso. Cafwyd cinio Nadolig anhygoel eto leni, gan Anti Aloma ac Anti Sian a braf oedd cael gweld llond y neuadd yn bwyta cinio Nadolig traddodiadol. Diolch i’r Canon Emlyn Williams a’i dim arbennig o helpwyr fu’n creu 98 Christingle gyda’r plant, ac i’r plant gymerodd ran mewn gwasanaeth hyfryd yn Eglwys Cristiolus.

Y Canon Emlyn Williams gyda’r plant meithrin a’r Christingles.

Braint i gôr yr ysgol oedd cael cymryd rhan yng ngwasanaeth Goleuo’r Goeden yn Eglwys Sant Cyngar, Llangefni wedi ei drefnu gan Glwb Rotari Llangefni er mwyn cefnogi Hosbis Dewi Sant newydd yng Nghaergybi. Yn ogystal bu côr yr ysgol yn canu yng ngwasanaeth cylch yr Urdd ddechrau Rhagfyr. Mis prysur oedd Rhagfyr a diolch i bawb am roi cant y cant ym mhopeth. I goroni’r cyfan cafwyd sioe i’w chofio gyda tri perfformiad caboledig o ‘Pantolig’ gyda phob plentyn yn cael y cyfle i actio a chanu. Dilynwyd hynt a helynt y postmon wrth berswadio nifer lu o wahoddedigion – o ser y jwngwl i Sinderela a’i theulu i ddod i’r parti mawr i ddathlu’r brenin newydd. Ac roedd y gwisgoedd yn werth eu gweld!

Rhai o gast y sioe Nadolig!

Bedydd

Braint i holl ddisgyblion yr ysgol oedd cael bod yn rhan o fedydd Anti Aloma ac Anti Pat yn neuadd yr ysgol yn ddiweddar. Cafwyd gwasanaeth hyfryd dan arweiniad y Canon Emlyn Williams a’r holl ddisgyblion yn cymryd rhan. Yn ogystal cafodd disgyblion blwyddyn 3 a 4 brynhawn diddorol yn holi’r Canon Williams a Mrs Tracy Jones am Eglwys Sant Cristiolus.

Cogydd ysgol y flwyddyn

Llongyfarchiadau mawr Anti Sian ar ddod yn ail trwy Gymru yng nghystadleuaeth cogydd ysgol y flwyddyn. Rydym eisoes yn gwybod fod Anti Sian yn paratoi cinio ardderchog i’n plant ac fe gafodd gydnabyddiaeth haeddiannol am hynny.

Achub bywyd

Cafodd disgyblion yr adran iau sesiwn gwerthfawr iawn yng nghwmni Stephen o Ambiwlans St John’s yn dysgu beth i’w wneud petai person ddim yn anadlu. Yn ogystal cafwyd gwybodaeth sut i ddefnyddio’r deffibriliwr sydd ar gael i drigolion y pentref pe cyfyd anghydfod.

Canolfan Thomas Telford

Dysgodd disgyblion blwyddyn 5 a 6 lawer am strwythurau pontydd wrth ymweld a Chanolfan Thomas Telford. Cawsont ddysgu hefyd am hanes y ddwy bont ar draws y Fenai heddiw gan ryfeddu at ddawn Thomas Telford a Robert Stephenson. Diolch i Mr Gareth Jones a Mr Gareth Hughes am y ddarpariaeth arbennig ac am helpu’r disgyblion wrth greu pontydd cryf.

Disgyblion blwyddyn 5 a 6 ger Pont Thomas Telford

Andrew Southall – arlunydd lleol

Cafodd disgyblion blwyddyn 3 a 4 eu hysbrydoli gan yr arlunydd lleol Andrew Southall yn ddiweddar. Roedd pawb yn gwirioni ar ei waith celf hyfryd ac yn gofyn cwestiynau priodol. Diolch iddo am ddod draw a dangos ei waith arbennig.

Y briodas fawr

Cafodd priodas fawr y flwyddyn ei chynnal yn Eglwys Cristiolus ddiwedd Tachwedd. A phlant dosbarth Mrs Clare Owen – blwyddyn 1 a 2 oedd yn llenwi’r eglwys. Owen a Mia oedd yn priodi fel rhan o wasanaeth ffug y dosbarth wrth iddynt ymgyfarwyddo â dathliad arbennig ym mywyd Cristnogion. Diolch i’r Parchedig Emlyn Williams am weinyddu’r gwasanaeth arbennig. Yn dilyn y gwasanaeth gwledd arbennig yn yr ysgol a thamaid o’r gacen flasus.

Siaradwyr gwadd

Rydym wrth ein boddau yn gwahodd siaradwyr yn rheolaidd i Ysgol Henblas. Dros y mis diwethaf rydym yn ddiolchgar i’r canlynol am eu cyfraniadau gwerthfawr: Sian Parry ar ran ‘Paid Cyffwrdd Dweud’, Agor y Llyfr, Parchedig Emlyn Williams a PC Owain.

Noson Siopa Nadolig

Cafwyd noson hyfryd yn y noson siopa Nadolig a’r ysgol yn llawn o drugareddau a chrefftau ar gyfer y Nadolig. Ac wrth gwrs roedd y dyn ei hun yno – Sion Corn yn sgwrsio a thynnu lluniau gyda’r plant. Diolch i bawb am gefnogi ac am helpu i godi £600 tuag at yr ysgol.

Anthem Ysgol Henblas gyda Mei Mac

Braint i ddisgyblion blwyddyn 5 a 6 oedd cael treulio bore yng nghwmni’r prifardd Mei Mac ddechrau Tachwedd. Llwyddodd Mei a’r plant i greu anthem Ysgol Henblas yn seiliedig ar ein gweledigaeth ‘gwreiddiau i dyfu - adenydd i hedfan’. Dyma hi:

Anthem Ysgol Henblas

Lle bu Ifan o Baradwys,
Lle bu gerddi hardda’r Ynys,
Heb fod yn bell o gloch Cristiolus,
Mae 'na ysgol hardd, hudolus,
Lle mae parch at fyd a ffrindiau,
Lle rwy’n dod i fagu gwreiddiau.

Cytgan:
Henblas! Ysgol Henblas! Yw fy nghri!
Diolch Ysgol Henblas am fy ysbrydoli i.

O dan un to mae awch am wybod,
Am ein byd mawr a’i ryfeddod,
Rhwng y muriau cadarn, lliwgar
Y mae aelwyd clên cyfeillgar.
Lle daw fory at ei gilydd,
Lle mae croeso byth a beunydd.

Cytgan:
Henblas! Ysgol Henblas! Yw fy nghri!
Diolch Ysgol Henblas am fod yn ffrind i mi.

Fel bu adar T.G.’n mentro,
Fe ddaw amser i mi fudo,
Ac os af ymhell i nythu,
Boed haul braf neu storm yn chwythu,
I hedfan dros pob her o’m cwmpas,
Yn gefn i mi fydd Ysgol Henblas.

Cytgan:
Henblas! Ysgol Henblas! Yw fy nghri!
Diolch Ysgol Henblas am fy ngwarchod i.

Ffatri Siocled

Fel rhan o’u thema ‘bwyd a ffermio’ aeth disgyblion blwyddyn 3 a 4 i ffatri siocled yn Llandudno i gael gweld sut mae’r cynnyrch yn cael ei baratoi a’i gynhyrchu. Yn ôl pob sôn roedd y siocled yn flasus dros ben a’r plant wedi gwirioni yn y ffatri.

Stiwdio Sain

Cafodd disgyblion blwyddyn 5 a 6 ddiwrnod cofiadwy yng Nghanolfan Stiwdio Sain, Llandwrog yn dysgu am hanes sîn recordio cerddoriaeth Gymraeg. Ar ôl cinio buont yn recordio ‘Ty ar y mynydd’ gyda’r Welsh Whisperer – ac roedd yna forio canu! Efallai bydd rhai yn dychwelyd i recordio yno yn y dyfodol.

Marchnad Cynnyrch Lleol

Fe drefnodd disgyblion blwyddyn 3 a 4 farchnad cynnyrch lleol ganol mis Tachwedd. Y disgyblion fu’n gyfrifol am wahodd y cwmniau a’r busnesau lleol yn ogystal a threfnu’r marchnata a’r raffl. Cafwyd prynhawn gwefreiddiol a llond neuadd o gwsmeriaid. Llongyfarchiadau i’r disgyblion a’r plant ar drefnu a pharatoi digwyddiad o’r fath gan wneud elw o £704.80!

Bocsus Nadolig

Diolch i bawb gefnogodd ein ymgyrch Teams 4U eleni. Llwyddodd Bedwyr ac Alfie i sicrhau bod yr holl focsus wedi cyrraedd Ysgol Llangefni yn ddiogel.

Athletau dan do

Llongyfarchiadau i dîm Ysgol Henblas ar ddod yn ail yn y gystadleuaeth athletau dan dô ym Mhlas Arthur. Cafwyd sawl perfformiad arbennig a phob aelod o’r tîm wedi cyfrannu’n werthfawr i’r llwyddiant.

Jodrell Bank

Cafodd disgyblion blwyddyn 5 a 6 ddiwrnod i’w gofio yn Jodrell Bank yn dysgu llawer am y bydysawd. Buont yn wyddonwyr chwilfrydig wrth ymwneud â sawl arbrawf ac roedd y profiad yn y babell hud yn arsylwi’r sêr yn arbennig, heb anghofio rhyfeddu at y ddysgl fawr sydd yn ymchwilio’n barahaol i’r bydysawd mawr.

Cogydd y flwyddyn

Cawsom newyddion mawr i’w ddathlu – wrth ddeall bod Anti Sian wedi mynd trwodd i rownd nesaf cogydd y flwyddyn. Llongyfarchiadau mawr a phob hwyl ym Manceinion!

Adnodd i’r gymuned - diffibriliwr

Gosodwyd adnodd hanfodol i’r gymuned tu allan i fynedfa’r ysgol ddechrau Tachwedd. Mae’r diffibriliwr bellach yn ei le ac ar gael petai ei angen mewn argyfwng.

Gwasgu afalau

Rydym yn andros o ddiolchgar i Mike Allen am roi profiadau diddorol i’r holl blant yn yr ardd. Yn ddiweddar daeth at ddisgyblion blwyddyn 3 a 4 i gynnal sesiwn gwasgu afalau. Buont yn golchi a thorri’r afalau cyn mynd ati i’w gwasgu yn y peiriant gwasgu arbennig! Llwyddwyd i greu sudd afal blasus iawn! Roedd y disgyblion wedi mwynhau’r sesiwn yn fawr iawn.

Ymweliad tân.

Mwynhaodd plant blwyddyn 1 a 2 ymweliad gan Gwawr o’r frigad dân. Dysgodd y plant am swydd Sam Tân a sut i gadw’n ddiogel yn y cartref wrth ddysgu sut i sicrhau fod y ‘larwm tân yn gweithio! Cafodd y plant lawer iawn o hwyl wrth edrych ar wisg Sam Tân – a’u gwisgo. Roedd yn waith poeth gwisgo’r holl ddillad!!

Sioe Mon

Aethpwyd a llond berfa o gynnyrch yr ardd ysgol i Sioe Mon yn ystod gwyliau’r haf. Daeth yr ysgol yn drydydd yn y categori cynradd ac roedd yr holl lysiau ffres yn werth eu gweld. Diolch eto i Mike.

NSPCC

Daeth Rhian draw i’r ysgol i siarad gyda’r holl ddisgyblion am sut y dylent ymateb pan fo heriau yn eu hwynebu. Cafwyd cyngor doeth iawn a‘r plant yn ymateb yn aeddfed wrth drafod gyda Rhian.

Sioe hanes Cymru

Dysgodd y plant am fwy o ffigyrau hanesyddol Cymru wrth wylio’r sioe ‘Tales of Wales’. Daeth y sioe i ben gyda hanes Betsi Cadwaladr a chyfle i’r plant ddysgu am ei phrofiadau yn teithio ar hyd a lled y byd yn helpu eraill mewn helyntion. Bu llawer o’r plant yn actio yn y sioe ac roedd eu mwynhad yn amlwg o’r wynebau siriol!

Dosbarth derbyn a meithrin

Mae plant bach y dosbarth derbyn a meithrin wedi hen setlo gyda Mrs Owen, Anti Diane ac Anti Carol. Mae’r 23 ohonynt yn werth eu gweld yn eu gwisg ysgol ac maent yn griw hapus a chyfeillgar dros ben!

Golchi dwylo

Bu Nyrs Mandy yn yr ysgol yn siarad am y dull cywir o olchi dwylo gan ddangos mor gyflym mae’r germau yn gallu ymledu. Diolch unwaith eto iddi am y cyngor doeth.

Diogelwch yn yr haul

Daeth Cerys o Tenovus i’r ysgol i roi cyngor i’r plant ar sut i gadw’n ddiogel yng ngwres yr haul – cyngor doeth o ystyried yr ha bach Mihangel a gafwyd. Eli haul, cap, diod a gorchuddio’r croen rhag gwres yr haul oedd y neges bwysig.

Ffarwel

Rydym yn dymuno’n dda i ddisgyblion bendigedig blwyddyn 6 sydd yn dechrau ar antur newydd cyffrous yn yr ysgol uwchradd. Maent wedi bod yn griw hollol arbennig ac mae wedi bod yn fraint eu gweld yn datblygu cymaint dros y blynyddoedd gan feithrin yr holl rinweddau ydym eisiau eu gweld yn ein plant yma yn Ysgol Henblas – sef plant parchus, cwrtais a boneddigaidd. Edrychwn ymlaen at glywed eu hanesion yn mynd o nerth i nerth.

Cliciwch yma i weld y fideo

Gwobrau Chwaraeon Ynys Mon a Gwynedd

Ysgol Henblas yw enillwyr ysgol gynradd y flwyddyn Ynys Mon a Gwynedd 2019. Diolch o galon i bawb sydd wedi cyfrannu tuag at hyn - yr hyfforddwyr, y rhieni, y staff ond yn bwysicach oll.....y plant gwych. Yn ogystal daeth y tîm peldroed yn ail yn y categori tîm y flwyddyn. Llongyfarchiadau!

Talent Henblas

Cafwyd diwrnod hwyliog gyda llawer o’r disgyblion yn cymryd rhan yn Talent Henblas. Cafodd pawb eu diddanu gan y plant talentog sydd yma. Llongyfarchiadau i Charlie, Daniel, Sion a Caio am ennill y bleidlais gan eu ffrindiau.

Llyfrau newydd

Llawer o ddiolch i Catherine Jones ac Elusen Cefnogol am y rhodd ariannol tuag at lyfrau newydd i blant y Cyfnod Sylfaen. Fel y gwelwch - mae'r plant wrth eu boddau.

Wythnos iechyd a ffitrwydd

Ar ddechrau Gorffennaf cafwyd wythnos iechyd a ffitrwydd wedi ei drefnu gan y brwp iach. Cafwyd gweithgareddau karate, sesiwn cylchdroi ffitrwydd, swmba, athletau a chodi pwysau. Roedd llond neuadd wedi mwynhau'r brecwast iach. I goroni’r wythnos fe redodd pob disgybl yn y ras am fywyd. Da iawn bawb.

Cliciwch yma i weld mwy o luniau

Cliciwch yma i weld lluniau y brecwast iach

Ras am fywyd – ymchwil cancr

Daeth Claire o elusen ymchwil cancr draw i'r ysgol heddiw i dderbyn yr arian oedd y plant wedi ei godi yn dilyn y ras am fywyd gynhaliwyd yn ystod yr wythnos iechyd a ffitrwydd. Llwyddodd y plant i godi £668 ar gyfer yr elusen – swm anhygoel fydd yn gymorth arbennig i achos mor werthfawr. Diolch i bawb am gefnogi.

Bingo haf

Cafwyd noson dda yn y bingo haf wedi ei drefnu gan y gymdeithas rhieni/athrawon. Diolch i bawb am gefnogi gan helpu i godi £248 tuag at yr ysgol.

Canu gydag Edward

Mae bob tro yn bleser croesawu Edward Morus Jones i Ysgol Henblas ac mae’r plant yn ymgolli yn hwyl y canu. Cafwyd prynhawn bendigedig o forio canu a’r holl blant yn mwynhau. Diolch Edward ac edrychwn ymlaen at y tro nesaf.

Pili Palas

Cafodd disgylblion y cyfnod sylfaen daith gyffrous i Pili Palas ar ddiwedd y tymor gan weld llawer o loynod byw a thrychfilod. Roedd rhai ddigon dewr i afael yn y neidr. Diolch i Pili Palas am y croeso eto.

Ffrind o India

Rhoddwyd croeso cynnes i'n ffrind o India - Avantika ddaeth draw i siarad gyda disgygblion blwyddyn 3-6. Cafodd sawl cwestiwn da ei ofyn gan y plant ac roeddent yn chwilfrydig am ei hysgol yng ngogledd India. Roeddent wedi synnu o ddysgu fod pwll nofio a cheffylau yn yr ysgol!

Cors Ddyga

Diolch i'r Parch Hywel Meredydd Davies am ddod i siarad am yr adar sy'n bosib eu gweld yng Nghors Ddyga. Roedd yn hyfryd clywed y plant yn canu Deryn y bwn - efallai gall y plant ei weld yn y gors?!

Rheolaeth y ffin

Roedd yna gyffro ar yr iard ar ddiwedd y tymor pan ymddangosodd fan wen y tim rheoli’r ffin. A phwy oedd yn ei gyrru – wel neb llai na tad Cai o flwyddyn 3 sef Mr Andy Linney. Daeth i’r dosbarth i siarad am ei waith yn arolygu’r ffin a’r porthladd. Soniodd am yr eitemau rhyfeddol mae wedi dod are u traws – gan gynnwys gorilla!! Diolch yn fawr i Mr Linney am fore difyr dros ben.

Rygbi ar y traeth

Cafodd tîm rygbi’r ysgol ddiwrnod da ar draeth Llanddwyn gan ymuno â llawer o dimau ysgolion yr ynys. Cafwyd perfformiadau da a diolch i Michael Coyne am eu hyfforddi eto.

Cliciwch yma i weld mwy o luniau

Argraffu celf

Rhoddwyd croeso cynnes i ffrind annwyl iawn i ni yma yn Ysgol Henblas sef yr artist Diana Williams. Diolch iddi am gynhyrchu gwaith argraffu bendigedig gyda'r plant ym mlwyddyn 3 a 4 – gwaith fydd i’w weld yn fuan yn Oriel Mon fel rhan o brosiect cefl yn astudio gwaith a bywyd yr artist Elizabeth Morgan o Henblas.

Ffair haf

Diolch i bawb am gefnogi'r ffair haf. Agorwyd y ffair mewn steil gan Arfon Wyn a chriw o ddisgyblion yn ei gefnogi ar offerynnau amrywiol. Roedd awyrgylch hapus braf eto eleni a diolch i bawb o’r gymdeithas rhieni/athrawon fu'n helpu i baratoi dan arweiniad Helen a Carys. Llwyddwyd i godi £520.

Cliciwch yma i weld mwy o luniau

Garddio

Blas i chi o’r gwaith diweddar yn yr ardd. Diolch i bawb sydd wedi helpu a chlod mawr i Mike Allen. Mae’r plant ar draws yr ysgol wedi cael budd mawr o’r garddio ac wedi meithrin sgiliau newydd yn ogystal â mwynhau gweld y dilyniant o’r ardd i’r blât fwyd.

Gweithgareddau i blant dros gwyliau'r haf

Cliciwch yma am fwy o wybodaeth

Gwobrau chwaraeon Gwynedd a Môn 2019

Wehei! Wehei! Wehei! Ysgol Henblas yw enillwyr ysgol gynradd y flwyddyn Gwynedd a Mon 2019. Diolch o galon i bawb sydd wedi cyfrannu tuag at hyn - yr hyfforddwyr, y rhieni, y staff ond yn bwysicach oll.....y plant gwych. Yn ogystal daeth y tîm peldroed yn ail yn y categori tîm y flwyddyn. Llongyfarchiadau!

Cliciwch yma am fideo Gwobrau chwaraeon 2019

Cegin o fri

Rydym yn gyson ddiolchgar am y bwyd bendigedig sydd yn cael ei ddarparu yn ddyddiol amser cinio. Yn ddiweddar cafodd y gwasanaeth hwn gydnabyddiaeth haeddiannol pan ddaeth swyddogion y cwmni arlwyo Caterlink sef Dawn Williams ac Alan Coward i wobrwyo Anti Sian ac Anti Aloma ar gael marciau llawn mewn arolwg darpariaeth. Llongyfarchiadau mawr i’r ddwy a diolch yn fawr am bopeth – ac am helpu i sicrhau fod cyfran mor uchel o blant Ysgol Henblas yn mwynhau cinio ysgol a chael diet cytbwys dyddiol.

Tarian Ieuan Wyn Jones

Chwaraeodd tîm pel-droed yr ysgol yn rownd derfynol tarian Ieuan Wyn Jones yn ddiweddar yn erbyn tîm da o Ysgol Pencarnisiog. Colli oedd yr hanes y tro hwn. Da iawn bob un ohonynt a diolch yn fawr i Barry Edwards am roi oriau i’w hyfforddi. Ser y dyfodol heb os.

Mabolgampau 2019

Cafwyd diwrnod da a heulog wrth i’r plant gymryd rhan yn y mabolgampau a thorf dda wedi dod i’w cefnogi. Roedd yn gystadleuaeth agos drwy’r prynhawn rhwng tîm Cybi a tîm Seiriol ac wedi 30 ras wahanol dim ond 5 pwynt oedd ynddi ar y terfyn. Eleni - tîm Cybi aeth a hi, ond roedd yr holl blant wedi cyfrannu’r werthfawr at lwyddiant eu timau.

Cliciwch yma i weld mwy o luniau

Cynnyrch yr ardd

Rydym wrth ein boddau yn gweld y llysiau yn ffynnu yn yr ardd dan arweiniad Mike Allen. Mae holl blant yr ysgol wedi cyfrannu at y tyfiant bendigedig ac wedi cael modd i fyw wrth weld y symud o’r tir i’r plat bwyd. Diolch i Anti Sian ac Anti Aloma am baratoi’r llysiau fel salad hyfryd wrth ochr y prif gwrs. Roedd yn wych gweld y plant yn mwynhau ac yn gwerthfawrogi eu gwaith caled.

Twrnament rygbi

Cafwyd perfformiadau campus gan y timau rygbi yn nhwrnament rygbi tag Ynys Môn gan dîm blwyddyn 3 a 4 a thîm blwyddyn 5 a 6. Roedd canmoliaeth mawr i’w cyd-chwarae a phob un yn rhoi ei orau yn enw’r ysgol. Diolch o galon i Mike Coyne am eu hyfforddi mor fedrus.

Cliciwch yma i weld y lluniau

Croeso i’r dosbarth derbyn

Daeth 16 o blant y cylch meithrin i Ysgol Henblas i gael blas o fywyd yr ysgol cyn iddynt drosglwyddo ym mis Medi. Roedd Mrs Owen, Anti Diane ac Anti Carol wedi cael bore difyr ac hwyliog dros ben yn eu cwmni ac maent yn edrych ymlaen yn eiddgar at eu croesawu yn barhaol ym mis Medi. Croesawyd y rhieni yn ogystal a chafwyd prynhawn hyfryd wrth iddynt flasu bwyd y gegin,profi cynnyrch yr ardd a chael blas o fwrlwm yr ysgol. Yn ogystal, mewn datblygiad cyffrous i Ysgol Henblas bydd plant oed meithrin - sef y flwyddyn islaw’r derbyn yn cael eu haddysgu yn yr ysgol am 10awr yr wythnos o fis Medi ymlaen. Edrychwn ymlaen at groesawu’r criw meithrin i’n plith yn ogystal ym Medi 2019.

Athletau sir yr Urdd

Aeth 31 o sgwad athletau’r ysgol i Ysgol Uwchradd Bodedern i gymryd rhan yng nghystadleuaeth athletau sir yr Urdd ynghyd ag oddeutu 1000 o blant yr ynys. Cafwyd perfformiadau da gan y plant a’r cystadlu’n frwd. Llongyfarchiadau i’r canlynol ar gyrraedd y tri uchaf:
Ras unigol bechgyn bl3 a 4: Osian
Naid hir bechgyn bl3 a 4: Osian
Taflu pel bechgyn bl3 a 4: Ioan
Taflu gwaywffon merched bl3 a 4: Ela
Ras unigol bechgyn bl 5 a 6: Daniel
Naid hir bechgyn bl 5 a 6: Caio

Twrnament pel droed pum bob ochr cenedlethol yr Urdd

Aeth y tim pel droed pump bob ochr yr holl ffordd i Aberystwyth i gymryd rhan yn nhwrnament cenedlaethol yr Urdd. Cafwyd 6 gem yn y grwp a’r tim yn curo 4 a chael 2 gem gyfartal oedd yn golygu eu bod trwodd i’r rownd derfynol. Colli oedd yr hanes yn y ffeinal yn erbyn tîm cryf o Castell Newydd Emlyn ond rydym yn hynod o falch o bob un ohonynt am berfformiadau gwych iawn. Diolch arbennig i Barry Edwards am eu hyfforddi i’r fath safon.

Twrnament rygbi cenedlaethol yr Urdd

Yn dilyn eu llwyddiant yn nhwrnament rygbi Urdd Ynys Môn aeth tîm rygbi’r ysgol i lawr i Aberystwyth i gymryd rhan yn nhwrnament cenedlaethol yr Urdd. Fe roddodd pob aelod o’r tîm bob ymdrech mewn gemau caled. Roedd yn brofiad campus a diolch arbennig i Mike Coyne am eu paratoi mor dda.

Twrnament rygbi tag ysgolion y dalgylch

Cafodd timau yr ysgol lwyddiant pellach yn nhwrnament rygbi dalgylch Cefni gyda thimau blwyddyn 5 a 6, a 3 a 4 yn ennill pob gem. Roedd yr holl chwaraewyr wedi perfformio yn gampus a diolch eto i Mike Coyne am eu hyfforddi.

Cliciwch yma am fwy o luniau

Traws gwlad

Bu 57 o ddisgyblion yr adran iau yn cymryd rhan yn y ras traws gwlad i blant y dalgylch yn Ysgol Gyfun Llangefni. Llwyddodd pob un i orffen y cwrs a llongyfarchiadau arbennig i Gruff ar ddod yn gyntaf yn y ras i fechgyn bl5 a 6 ac i Leo ar ddod yn drydydd yn y ras i fechgyn bl 3 a 4.

Cliciwch yma am fwy o luniau

Tacla Taid

Bu disgyblion bwyddyn 3 a 4 yn ymweld â ‘Tacla Taid’ gan ddysgu am hen gerbydau fel rhan o'r thema ‘Teithio’. Diddorol oedd gweld sut mae cerbydau wedi newid a'u cymharu hefo'r hyn sydd ganddom heddiw. Diolch am y croeso ac am fore o ddysgu am gymaint o newid dros amser ym myd trafnidiaeth.

Storiel

Cafodd disgyblion blwyddyn 3 a 4 y fraint o fynd i'r Storiel ym Mangor i ddysgu am Elizabeth Morgan a oedd yn byw yn Henblas flynyddoedd yn ôl. Roedd yn ddiddorol clywed am yr ardd arbennig ac hanesion lleol yn ogystal a gweld arteffactau ac archifau sydd wedi deillio o Llangristiolus.

Fferm y Foel

Aeth plant y Cyfnod Sylfaen ar ymweliad i Fferm y Foel fel rhan o’r thema ‘Tri Mochyn Bach’. Cawsont lawer o hwyl wrth ddysgu am yr hyn mae’r anifeiliaid ei angen a ble mae gwahanol anifeiliaid yn byw! Cafodd pawb gyfle i fwydo‘r anifeiliaid amrywiol gan gael antur wrth fynd am dro ar y tractor a’r cwad….sôn am gyffro!! Diwrnod arbennig i sbarduno’r plant wrth iddynt ddefnyddio eu gwybodaeth a’u dealltwriaeth o’r ymweliad yn ôl yn yr ysgol.

Gardd yr ysgol

Mae plant y Cyfnod Sylafen – gyda Mike Allen, wedi bod yn gofalu am y llysiau yn yr ardd, ac yn ddiweddar roedd y ciwcymbyr yn barod. Bu’r plant yn blasu’r ciwcymbyr yn ystod eu hamser ffrwyth – ac roedd pob un yn canmol y ciwcymbyr ffres. Aeth gweddill y ciwcymbyr i’r gegin i helpu gwneud salad amser cinio ar gyfer yr ysgol gyfan! Mae’n rhaid fod y sôn am y ciwcymbyr blasus wedi ymledu oherwydd daeth ein ffrindiau o Lithuania bell draw i weld y cynnyrch yn tyfu yn yr ardd. Cafodd y plant gyfle i’w holi am y wlad yn heulwen y prynhawn a dysgu ambell air o’u iaith.

Cliciwch yma am fwy o luniau

Rygbi

Cafwyd prynhawn bendigedig o rygbi rhwng timau Ysgol Henblas ac Ysgol Bodffordd yn haul mis Mai. Diolch i Mr Roberts am y croeso ac i blant Ysgol Bodffordd am y gemau campus – edrychwn ymlaen i’w croesawu yn ôl i Ysgol Henblas cyn diwedd yr haf.

Adeiladu tai

Cafodd gwaith gwych ei gyflawni dros ddyddiau cyntaf mis Mai gan blant (a rhieni!) y Cyfnod Sylfaen. Llwyddodd pob plentyn i wneud model 3D o’u cartref i’w arddangos yng nghyntedd yr ysgol. Penseiri y dyfodol!

Cliciwch yma am fwy o luniau

Caerdydd

Ddiwedd mis Ebrill aeth 21 o ddisgyblion blwyddyn 5 a 6 yr holl ffordd i Gaerdydd i fwynhau tridiau yn y brifddinas gan aros yng ngwersyll yr Urdd yng nghanolfan y Mileniwm. Roedd llawer o weithgareddau wedi eu cywasgu i’r tridiau gan gynnwys ymweld a stadiwm Dinas Caerdydd, nofio ym mhwll y Bae, taith gyffrous ar gwch cyflym yn y Bae, profi gwyddoniaeth a thechnoleg yng nghanolfan Techniquest, ymweld a’r Royal Mint, a thaith o amgylch y Cynulliad lle cawsont gwrdd a Mr Rhun ap Iorwerth A.C. Roeddent yn blant ardderchog a diolch arbennig i Mrs Ruth Gilford am ei gwaith medrus yn goruchwylio.

Raft Race

Mae wedi bod yn flwyddyn llwyddiannus iawn ym myd chwaraeon yn Ysgol Henblas eleni a’r plant wedi dod i’r brig ym meysydd gymnasteg, peldroed, rygbi a rhedeg trawsgwlad. Ond tro’r rhieni oedd hi ddiwedd mis Mai pan ddaeth tîm rafftio’r rhieni - dan arweiniad medrus y capten Berwyn Griffiths i’r brig yn ras rafftio’r Fenai. Dechreuodd y criw yn chwim o Felinheli gan agor bwlch iach rhyngddynt a gweddill y rafftiau. Erbyn cyrraedd y lanfa ym Mhorthaethwy roedd y bwlch wedi tyfu a’r tîm yn ennill o flaen tyrfa dda - yn cynnwys plant a rhieni’r ysgol. Llongyfarchiadau mawr i’r tîm - tipyn o gamp!
Cliciwch yma am y canlyniadau
Cliciwch yma am fwy o luniau

Môn ar Lwy

Croesawyd Mrs Helen Holland a 5 twb blasus o hufen iâ Mon ar Lwy ddiwedd y tymor. Dysgodd y plant sut y llwyddodd Helen i wireddu ei breuddwyd o greu a rhedeg busnes hufen iâ llwyddiannus. Roedd yr hufen iâ yn fendigedig - brysiwch draw eto Helen!

Sbwriel ar ein traethau

Rydym yn byw mewn lle mor hyfryd ac mae’n flin gennym weld yr holl sbwriel sydd ar ein traethau godidog. Yn ddiweddar roedd plant yr ysgol yn rhagweithiol wrth ofalu am eu byd gan ddangos parch tuag at eu hardal leol. Da iawn bawb o ddosbarth Mrs Roberts a Mrs Owen fu wrthi’n casglu sbwriel ar draeth Rhosneigr.

Clwb celf a chrefft

Rydym yn hynod ddiolchgar i Anti Nia, Elen Clode a Louise Quinn am gynnal clwb celf a chrefft dros y misoedd diwethaf. Mae’r plant wedi cael profiadau gwerthfawr yn creu ac mae’n werth gweld y creadigaethau terfynol. Diolch i’r plant am fod mor frwdfrydig ac i’r dair am eu harwain mor fedrus.

Eglwys Cristiolus

Yn ystod yr wythnosau cyn y Pasg roedd Mr Emlyn Williams wedi tywys y plant drwy’r prif ddigwyddiadau arweiniodd at y croeshoelio. Yn ddiweddar bu disgyblion blwyddyn 3 a 4 yn Eglwys Sant Cristiolus lle cawsont brynhawn difyr yn dysgu rhagor am yr eglwys. Diolch arbennig i Mr Emlyn Williams am y croeso cynnes.

Peldroed

Tra bod seibiant yn y gystadleuaeth cwpan Ieuan Wyn Jones cafwyd gem gyffrous rhwng tîm Ysgol Henblas a thîm Ysgol Parc y Bont. Diolch eto i Barry Edwards am roi ei amser yn hyfforddi a llongyfarchiadau i’r ddau dîm am chwarae gem mewn ysbryd iach. Diolch Ysgol Parc y Bont am y croeso a phob hwyl am weddill y tymor.

Gardd yr ysgol

Diolch i Mike Allen am weithio gyda phlant yr ysgol yn paratoi’r planhigion yn yr ardd. Maent wedi bod yn brysur dros yr wythnosau diwethaf yn paratoi’r gwelyau ac yn plannu. Rydym yn gwerthfawrogi cymorth y rhieni fu’n helpu Mike yn ogystal a Mr Huw Myrddin o’r pentref ddaeth draw un prynhawn fel rhan o’r ymgyrch ‘Tyfwch gyda mi’. Edrychwn ymlaen at weld y cynnyrch terfynol.

Eisteddfod Sir yr Urdd

Rydym yn falch iawn o’r holl ddisgyblion fu’n cystadlu yn enw Adran Henblas yn eisteddfod sir yr Urdd. Roeddent i gyd yn wych a phob un yn perfformio o’r galon. Diolch arbennig i Elen Keen sydd wedi rhoi oriau o’i hamser yn paratoi’r plant. Pob hwyl i Eluned a Jasmine fydd yn cynrychioli’r adran a’r sir yng Nghaerdydd ddiwedd Mai.

Dingle

Aeth disgyblion blynyddoedd 3 a 4 i chwilio am wiwerod goch yn y Dingle, a do wir fe ddaeth sawl un i’r golwg. Buont hefyd yn creu bwyd i’r adar bach gan ddefnyddio cangen a chwyr. Bore difyr iawn yn y goedwig.

Eisteddfod yr Urdd

Cafwyd diwrnod prysur o gystadlu yn Eisteddfod cylch yr Urdd gyda llawer o lwyddiannau i’r plant fu’n cystadlu yn enw Adran Henblas. Da iawn blant a phob hwyl yn Eisteddfod y sir. A diolch anferthol i Elen am ei holl waith hyfforddi di-flino.

Wythnos Gwyl Dewi

Ar ddechrau Mawrth bu wythnos o ddathlu Gwyl Dewi Sant. Aeth plant y cyfnod sylfaen i ganu gyda’u cyfoedion o weddill y dalgylch yn Ysgol y Graig. Bu disgyblion yr adran iau yn gorymdeithio gyda’u ffrindiau o ysgolion y dalgylch yn Llangefni ac yna’n mwynhau brwydr y bandiau ysgolion uwchradd yn Ysgol Gyfun Llangefni. Cafwyd disgo cerddoriaeth Gymreig yn ogystal a chydtadleuaeth creu cacennau yn cyfleu Cymreictod a lwyddodd i hofi £107.

Te pnawn Cymreig

Roedd yn hyfryd gweld neuadd yr ysgol yn orlawn i ddathlu Gwyl Dewi. Diolch i’r plant am yr adloniant ac i’r rhieni am baratoi te a chacennau blasus. Llwyddwyd i godi £277 tuag at yr ysgol.

Karate

Daeth Karate Cymru i gynnal sesiynau karate gyda holl blant yr ysgol. Roedd tipyn o ffocws ar y gallu i ganolbwyntio ac roedd yn werth gweld y plant yn llwyr ymroi i’r gamp.

Arweinwyr ifanc

Diolch i Barry ac Aaron am roi hyfforddiant arbennig i ddisgyblion blwyddyn 5 a 6 - diwrnod o baratoi y disgyblion fel arweinwyr chwaraeon o dan y cynllun Playmaker. Cawsont y cyfle i ddysgu llawer o sgiliau allweddol a hynny mewn modd hwyliog ac ymarferol.

Lego

Diolch i Catrin Williams o Coleg Menai am ddod draw i gynnal sesiwn o greu mecanweithiau gyda Lego. Roedd bwrlwm pendant yn y dosbarth a’r disgyblion wedi ymgolli yn y creu. Braf oedd eu gweld yn arbrofi a dyfalbarhau.

Beicio

Llongyfarchiadau i holl ddisgyblion blwyddyn 5 a 6 ar lwyddo i gael eu cymhwyster beicio yn ddiogel ar y ffordd. Diolch i Mrs Ashworth a Martina am eu hyfforddi’n drylwyr a phob hwyl ar y beicio diogel dros y misoedd nesaf - a chofiwch wisgo’r helmed.

Peldroed/ Cwpan Ieuan Wyn Jones

Yn dilyn y llwyddiant diweddar ym maes chwaraeon daeth rhagor o newyddion da pan gipiodd y tim peldroed 5 bob ochr yr ail safle yn nhwrnament Ynys Môn. Yn ogystal, cafwyd buddugoliaeth yn ddiweddar yn ail rownd cwpan Ieuan Wyn Jones. Diolch i Barry am hyfforddii’r tim unwaith eto. Perfformiad graenus ac aeddfed. Ymlaen i’r rownd nesaf.

Rygbi

Diolch i Mike Coyne am hyfforddi’r tim rygbi fu’n cystadlu yng nghlwb rygbi Llangefni yn ddiweddar. Mae’r tim wedi asio’n gret dros yr wythnosau diwethaf ac yn taclo’n rymus! Daeth llwyddiant i’w rhan wrth guro twrnament rygbi Ynys Mon a byddant yn teithio i Aberystwyth yn awr fis Mai. Perfformiad arbennig a chais hwyr Daniel yn curo’r dydd yn yr amser ychwanegol wedi gem galed!

Beicio

Mae’r holl feics a’r sgwters tu allan i fynedfa’r ysgol yn tystio i ymroddiad y plant a’r rhieni i’r ymgyrch Big Pedal. Dyma ddangos ymwybyddiaeth o fod yn ddinasyddion sydd yn parchu’r byd o’u cwmpas.

Perfformiad gwych iawn

Balch iawn o’r criw yma. Curo 4 a 2 gem gyfartal yn y grwp. Colli yn y ffeinal yn erbyn tîm cryf o Castell Newydd Emlyn. Perfformiad gwych iawn a phob un yn trio ei orau glas.

Timau rygbi

Tîm rygbi bl 3 a 4, a thîm rygbi bl 5 a 6 yn dathlu eu llwyddiant wedi twrnament rygbi yng nghlwb Llangefni. Da iawn blantos.

Taith Caerdydd

Cliciwch yma am wybodaeth cyffredinol
Cliciwch yma am amserlen Caerdydd
Cliciwch yma am lythyr taith Caerdydd

Bwydlen Haf 2019

Cliciwch yma am fwy o wybodaeth

Cinio ysgol am ddim

Cinio ysgol am ddim – rheolau yn newid o 01.04.19

Tim gymnasteg Ysgol Henblas

Mae unigolion a thîm gymnasteg Ysgol Henblas wedi mwynhau cryn lwyddiant dros yr wythnosau diwethaf – yng nghystadleuaeth ysgolion Ynys Môn, yn ogystal a chystadleuaeth sirol yr Urdd. Yn dilyn y llwyddiant hwn aeth y tîm yr holl ffordd i Aberystwyth i gystadlu yng nghystadleuaeth cenedlaethol yr Urdd ac wedi perfformiad campus fe gawsont y wobr gyntaf. Llongyfarchiadau mawr i’r 6 aeth lawr i Aberystwyth ac yn arbennig i Mrs Mair Eluned, Mrs Ruth Gilford a Mrs Kelly Owen am eu hyfforddi.

Gala nofio

Cafodd disgyblion yr ysgol lawer o lwyddiant yng ngala nofio Cefni a Borth ym Mhlas Arthus bore Dydd Iau yr 21ain o Chwefror. Enillodd Osian Keen y ras dull rhydd i fechgyn blwyddyn 3 a 4, daeth Lena Clode yn ail yn y dull rhydd i ferched blwyddyn 6, Leo Saxon ac Erin Quinn yn ail yn y ras broga i flwyddyn 3 a 4, a Sara Coyne, Sion Williams, Sian Rowlands, Ioan Coyne a Freya Tomblin yn 3ydd yn eu rasus hwy. Daeth tîm ras gyfnewid blwyddyn 3 a 4 yn 3ydd. Llongyfarchiadau i bawb ar eu llwyddiant.

O’r chwith: Lena, Ariana, Martha, Caio, Daniel ac Ifan

Gymnasteg unigol

Llongyfarchiadau i Cairon Rowlands ar ei lwyddiant mewn cystadleuaeth gymnasteg a gynhaliwyd yn ddiweddar. Mae Cai wedi bod yn gweithio’n galed ar ddatblygu ei sgiliau gymnasteg dros yr wythnosau diwethaf ac mae’r holl ymarfer wedi talu ar ei ganfed. Bydd yn mynd ymlaen i’r rownd nesaf yn Bala yn fuan, pob lwc iddo.

Pel droed

Mae wedi bod yn fis llwyddiannus i’n pedroedwyr – maent drwodd i rownd nesaf cystadleuaeth Ieuan Wyn Jones, daeth tîm yr adran yn fuddugol yng nghystadleuaeth 5 bob ochr yr Urdd, a daeth llwyddiant pellach yng nghystadleuaeth 5 bob ochr ysgolion y dalgylch. Camp a hanner.

Coginio da’n gilydd

Roedd arogl arbennig yn Ysgol Henblas yn ddiweddar wrth i’r 86 o ddisgyblion goginio gyda Richard Shaw ‘o gwmni ‘coginio da’n gilydd) a Carla Desmond (ysgolion iach). Paratowyd myffins bendigedig ac roedd y wraps hefyd yn flasus dros ben. Yn ogystal daeth rhieni y dosbarth cyfnod sylfaen yn y prynhawn i goginio gyda’u plant. Diolch i Richard a Carla am roi profiadau mor arbennig i’n plant.

Dathlu Dydd Gwyl Dewi

Dyma blant Cylch Henblas yn dathlu Dydd Gwyl Dewi. Bu pawb yn brysur yn gwneud gwaith celf, yn canu am y cennin pedr ac yn bwyta cacennau cri. Roeddent i gyd yn ddigon o sioe yn eu gwisgoedd.

Ardal allanol

Mae tipyn o newid wedi bod yn ardal allanol y cyfnod sylfaen dros yr wythnosau diwethaf – ac mae’r diolch am hyn i Mr Elfyn Roberts (tad Awel, Sion ac Elis). Mae Elfyn wedi bod yn brysur yn creu cegin fwd a mainc ac maent bellach yn eu lle. Ond roedd adeiladwyr bach prysur Mrs Manon Roberts yn barod i’w helpu wrth osod y celfi newydd yn eu lle yn y concrit. Diolch o galon i Eryl ac yn ogystal i Lisa am eu holl waith.

Coginio da’n gilydd

Roedd arogl arbennig yn Ysgol Henblas yn ddiweddar wrth i’r 86 o ddisgyblion goginio gyda Richard Shaw ‘o gwmni ‘coginio da’n gilydd) a Carla Desmond (ysgolion iach). Paratowyd myffins bendigedig ac roedd y wraps hefyd yn flasus dros ben. Yn ogystal daeth rhieni y dosbarth cyfnod sylfaen yn y prynhawn i goginio gyda’u plant. Diolch i Richard a Carla am roi profiadau mor arbennig i’n plant.

Ffarwelio

Roedd yn hyfryd cael croesawu Mrs Helen Pritchard yn ol i’r ysgol yn ddiweddar i ddiolch iddi am ei gwasanaeth arbennig tra yn gweithio yn y gegin. Gydag Anti Sian ac Anti Aloma roedd Anti Helen yn dîm ardderchog a phlant Ysgol Henblas yn ffodus dros y blynyddoedd o’i gofal. Cofiwch Anti Helen – bydd croeso yma i chi bob tro.

Gymnasteg

Cafodd tim gymnasteg Ysgol Henblas lwyddiant yn nghystadleuaeth gymnasteg Urdd y sir pan ddaeth nifer o wobrau i’w rhan. Daeth Ifan Gilford yn ail yn unigol; Martha Gilford ac Ariana Hardy yn ail yn y gystadleuaeth i barau; Martha, Ariana a Gwen Coyne yn ail yn y triawd, a daeth y tim yn fuddugol. Llongyfarchiadau i bawb fu’n cystadlu a phob lwc iddynt yn cynrychioli’r Sir yn Aberystwyth mis nesaf. Hoffem ddiolch hefyd i Mair Eluned a Ruth Gilford am eu hyfforddi ac i Mrs Owen am gydlynu’r holl baratoi.

Lesotho

Y tymor hwn mae disgyblion blwyddyn 5 a 6 yn astudio Lesotho - gwlad y mae Cymru wedi gefeillio gyda hi. Ffrind da i’r ysgol sydd â chyswllt arbennig â Lesotho yw Mr Alun Pritchard. Daeth Mr Pritchard i’r ysgol i roi cyflwyniad am y wlad ac ateb cwestiynau treiddgar gan y disgyblion. Dysgodd y disgyblion lawer am y wlad sydd tua’r un maint a Chymru a’i mynyddoedd mawreddog yn nodwedd amlwg. Diolch i Mr Pritchard am fore arbennig ac am gael benthyg arteffactau dros gyfnod y tymor.

Robert Recorde

Daeth cwmni drama ‘Mewn Cymeriad’ i’r ysgol i gyflwyno sioe hwyliog yn ymwneud a rhifedd. Cafodd y disgyblion awr ddifyr dros ben ac roedd eu mwynhad yn amlwg wrth ddilyn anturiaethau’r prif gymeriad Robert yn gofyn am eu cymorth i ddatrys problemau mathemategol. Yn raddol roedd yr atebion i bob problem yn arwain at lythyren oedd yn creu gair mathemategol penodol.

Gwylio adar

Mae disgyblion blwyddyn 3 a 4 wedi bod yn cymryd rhan mewn arolwg gwylio adar gan gynnal awdit o’r adar sydd yn ymweld a gardd yr ysgol dros gyfnod o bythefnos. Maent wedi mwynhau dysgu am y gwahanol fathau o adar. Dyma gyfle arbennig i ddatblygu medrau rhifedd y disgyblion ymhellach!

Gwyddoniaeth

Daeth Ms Awen Ashworth o gwmni Horizon draw i addysgu disgyblion blwyddyn 3 a 4 am ol traed carbon. Roedd yn sesiwn gwybodus a diddorol dros ben a’r plant yn deall yr effaith mae dyn yn ei gael ar yr amgylchedd.

Christingle

Cafwyd gwasanaeth hyfryd yn Eglwys Sant Cristiolus ychydig cyn y Nadolig dan arweiniad y Parchedig Emlyn Williams. Yn ystod y dydd roedd holl blant yr ysgol wedi bod yn creu Christingle gan ddysgu am arwyddocad yr holl elfennau sy’n perthyn iddo. Diolch i’r plant am berfformio mor swynol dan arweiniad Mrs Legge ac i’r Parchedig Emlyn Williams am ei amser yn rhoi profiadau arbennig i’r plant.

Pip y Pengwin

Dyna hyfryd oedd gweld neuadd yr ysgol yn orlawn ar gyfer dau berfformiad o’r sioe Pip y Pengwin yn ystod mis Rhagfyr. Cafodd y gynulleidfa ddilyn hynt a helynt Pip wrth iddo ddianc o sw Henblas gan deithio yn ôl i Antarctica at ei deulu. Roedd y canu a’r actio gan y plant yn fendigedig a phob un yn rhoi pob ymdrech. Diolch i bawb am gefnogi gyda’r gwisgoedd lliwgar.

Noson siopa Nadolig

Roedd yr ysgol wedi trawsnewid ar nôs Iau Tachwedd 29ain – yn llawn stondinau Nadolig ar gyfer y noson siopa Nadolig a drefnwyd gan y gymdeithas rhieni athrawon. Roedd yn hyfryd gweld yr ysgol yn orlawn a’r holl nwyddau a chrefftau arbennig oedd yn cael eu harddangos. Diolch i bawb am gefnogi a sicrhau fod y noson mor llwyddiannus, gydag awyrgylch arbennig yn llenwi’r holl ysgol. Gwnaethpwyd elw campus o £891.

Prydau Ysgol Di-dâl

Unwaith y byddwch wedi cwblhau’r ffurflen a’i chyflwyno gyda’r dogfennau cefnogol i naill ai’r ysgol neu’r Awdurdod Lleol, bydd eich plentyn yn dechrau cael prydau ysgol di-dâl.

Diolchgarwch

Roedd yn hyfryd gweld neuadd yr ysgol dan ei sang ar gyfer gwasanaeth diolchgarwch eleni. Diolch i bawb am gefnogi ac i’r holl blant am roi ymdrech mor dda wrth berfformio - o’r rhai ieuengaf yn y cylch meithrin i’r hynaf ym mlwyddyn 6. Casglwyd £333 tuag at ein ffrindiau yn Hafan Henblas, Kenya.

Gwasanaeth gan y Parchedig Hywel Davies a’r Cynghorydd Dylan Rees

Hoffem fel ysgol ddiolch i’r Parchedig Hywel Davies a’r Cynghorydd Dylan Rees am ddod draw i gynnal gwasanaeth yn son am y parc sglefro yn Llangefni. Bu’r ddau hefyd yn pwysleisio pwysigrwydd gwisgo dillad addas i sglefrio ac i “beidio bod fel melon” - h.y. rhaid cofio gwisgo helmed! Roedd y ddau yn canmol y plant am eu hymateb gwych a chwestiynau da.

Ymweliad PC Gilford a PCSO Katy

Dechrau Mis Hydref daeth PC Gilford a PCSO Katy i siarad gyda phlant y Cyfnod Sylfaen am eu gwaith. Ar ol sgwrsio cafodd y plant gyfle i eistedd mewn car a fan Heddlu yn ogystal a gwisgo gwisg yr Heddlu. Roedd y plant wedi mwynhau yn fawr iawn. Am fod yn blant mor dda cawsont lyfr lliwio i fynd adref. Cafodd y plant glod mawr gan PCSO Katy am eu hymddygiad gan nodi eu bod yn glod i’r ysgol.

Cyfeiriannu

Bu plant Blwyddyn 5 a 6 yn cyfeiriannu o amgylch Carreglwyd Llanfaethlu. Cafwyd bore llwyddiannus iawn. Cafodd y plant ymarfer eu sgiliau cyfeiriannu yn ogystal a gweithio mewn tim a chadw’n heini mewn amgylchedd prydferth. Diolch i Môn Active am drefnu ac i’r plant am eu cydweithrediad ac ymddygiad ardderchog.

Bake Off

Os oeddech yn pasio Ysgol Henblas ar nos Lun Hydref 22ain mae’n siwr eich bod wedi cael eich swyno gan yr arogleuon bendigedig. Ie – arogl y cacennau blasus oedd yn rhan o gystadleuaeth coginio Henblas Bake Off. Rhaid diolch a chanmol yr holl blant a rhieni am eu cynnyrch gwych, roedd llawer iawn o waith wedi mynd i mewn i’r coginio a’r beirniaid Anti Sian ac Anti Aloma wedi mwynhau y dasg o feirniadu a blasu’r cynnyrch! Braf oedd gweld neuadd yr ysgol yn orlawn ac yn llawn bwrlwm. Diolch yn fawr iawn i bawb am eu cefnogaeth ac i’r Gymdethas Rhieni Athrawon am eu gwaith caled yn trefnu.

Dysgu am hanes Cymru

Daeth cwmni Pandemonium draw i berfformio tair drama yn cyfwyno hanes Cymru. Cafodd y disgyblion wledd ac roedd cyfle iddynt fod yn rhan o’r sioe drwy berfformio mewn gwahanol olygfeydd. Yn sicr mae actorion y dyfodol yma Ysgol Henblas!

Diwrnod ffitrwydd

Aeth yr ysgol gyfan draw i gae sioe Mona ar gychwyn y mis i gymryd rhan mewn gweitgaredd ‘Go Fun Run’. Cafodd y plant ddiwrnod o weithio’n gorfforol a chafwyd hwyl wrth gynhesu fyny gyda’r masgot a dawnsio i gerddoriaeth amrywiol! Fe wnaeth yr holl ddisgyblion yn wych gan redeg o amgylch y trac a chwblhau’r ras!

Croeso i’r plant Newydd

Hoffai Mrs Roberts groesawu plant newydd i’r dosbarth Derbyn eleni, mae pawb wedi setlo yn wych!

Deinosoriaid

Rydym yn y Cyfnod Sylfaen wedi cael mis prysur iawn a llawn hwyl. Ein thema ar hyn o bryd yw ‘Deinosoriaid’. Cwsom fynd ar ymweliad i Stone Science er mwyn dysgu mwy am ddeinosoriaid, ac fe gafodd y plant gyfle hyd yn oed i afael mewn esgyrn deinosor!!

Selog

Daeth Selog i weld plant y Cyfnod Sylfaen a buont yn canu nifer o hwiangerddi Cymraeg a gwrando ar straeon ar app newydd Selog. Rydym yn edrych ymlaen i weld Selog eto yn fuan a diolch i Hanna o Menter Iaith Mon am gadw cwmni i Selog a diddori’r plant.

Siarter Iaith

Mae’r Siarter Iaith yn fyw yn Ysgol Henblas. Cafwyd etholiad i ddewis aelodau i’r grwp Siarter Iaith sydd yn barod wedi bod yn brysur iawn. Maent wedi trefnu cystadleuaeth i greu logo i’r grwp ac wedi bod yn sicrhau fod plant yr ysgol yn gwrando ar gerddoriaeth band y mi. Y mis hwn Yr Ods yw band y mis ac mae’r plant wrth eu boddau yn gwrando ar eu caneuon. Hefyd mae’r grwp Siarter Iaith yn ceisio annog plant yr ysgol i ddefnyddio idiom y mis yn ddyddiol a’r mis hwn mae pawb wedi bod yn torchi llewys!

Taith gerdded

Hoffai blwyddyn 3 a 4 ddiolch i Mr Huw Myrddin o bentref Llangristiolus am eu tywys ar daith o amgylch llwybrau cyhoeddus Llangristiolus. Cawsont weld llawer o lefydd nad oeddent wedi cyfarwyddo a hwy yn y gorffennol gan ddysgu am hanes yr ardal. Roedd yn ddiddorol dysgu am enwau cartrefi heddiw a chlywed am gymeriadau’r pentref gan gynnwys Jac Beti. Tybed ydach chi yn adnabod hanes Jac Beti? Diolch o galon i Huw am roi ei amser ac edrychwn ymlaen at ragor o deithiau yn ei gwmni yn y dyfodol.

Esgyrn y corff

Mae Mr Sion Quinn yn fwy adnabyddus fel un o rieni Ysgol Henblas, ac yn rhinwedd ei swydd fel ffysiotherapydd death I fewn at ddisgyblion blwyddyn 3 a 4 i drafod esgyrn y corff fel rhan o’r thema ‘Fi fy hun’. Roedd y plant wedi mwynhau dysgu llawer o ffeithiau am sut mae’r corff yn gweithio a phwrpas y sgerbwd. Diolch yn fawr iawn am brynhawn arbennig.

Taith i Lerpwl

Fel rhan o’r thema Ail Ryfel Byd bu disgyblion blwyddyn 5 a 6 yn amgueddfa morwrol Merswy yn dysgu am y frwydr ar gefnfor yr Iwerydd. Yn ogystal buont yn ymweld ac amgueddfa rhyfel Lerpwl gan gerdded i ystafell fawr ble’r oedd y frwydr ar y môr yn cael ei monitro. Dysgwyd fod cydlynydd yr ymgyrch - Admiral Horton wedi ei eni yn Rhosneigr. Cafwyd cyfle i astudio’r map anferth ar y wal yn ogystal ac ymrafael â sawl arteffact o’r cyfnod. Diwrnod diddorol dros ben.

Archifdy Môn

Daeth Lia o’r archifdy i rannu gwybodaeth am effaith y rhyfel ar Ynys Môn. Roedd y disgyblion wedi paratoi rhestr o gwestiynau ar ei chyfer a chafwyd llawer o ffeithiau diddorol gan gynnwys data am y nifer o fomiau oedd wedi disgyn ar drefi fel Caergybi, Llangefni a Phorthaethwy. Diolch hefyd am adael nifer o arteffactau fydd yn cyfoethogi dysgu’r disgyblion.

Pobi bara

Roedd yn werth gweld pob un o ddisgyblion blwyddyn 5 a 6 yn eu hetiau pobi wrth iddynt greu a siapio bara gyda Blodwen a Bryony o gwmni Caterlink. Diolch i Anti Sian, Anti Aloma ac Anti Helen am bobi’r bara yn y popty. Yn ôl y sôn roedd y bara yn flasus dros ben!

Golchi dwylo

Mae golchi dwylo yn gywir yn andros o bwysig a dyna’r neges gan Nyrs Mandy pan ddaeth draw i siarad gyda’r holl blant. Dangosodd yn effeithiol sut mae’r germau yn gallu ymledu mor hawdd o berson i berson e.e. wrth ysgwyd llaw. Bu Freya, Erin a Morgan yn modelu sut i olchi’r dwylo yn gywir gan wneud yn siwr fod y sebon yn mynd rhwng y bysedd a’r ewinedd. Diolch nyrs Mandy!

Parch Emlyn Williams

Mae’r plant wrth eu boddau yn cael gwasanaeth gan y Parch Emlyn Williams ar fore Mercher. Mae’n hyfryd clywed y plant yn morio canu ac yn symud yn egniol ar ôl clywed neges bwysig. Edrychwn ymlaen at ragor o straeon ac hanesion diddorol.

Big Pedal – Cyntaf drwy Gymru

Rydym wedi gwirioni ein bod wedi dod yn gyntaf drwy Gymru yng nghategori ysgolion llai Big Pedal. Mae hyn yn gamp a hanner ac hoffem ddiolch yn fawr i bawb gymerodd ran – y plant a’r rhieni am gefnogi. Diolch hefyd i Mrs Owen a’i thim Grwp Eco am gydgordio’r holl ymgyrch.

Blwyddyn 6

Rydym yn dymuno pob hwyl i ddisgyblion blwyddyn 6 ar eu hantur nesaf a’r cam cyffrous sydd yn eu hwynebu wrth ddechrau yn yr ysgol uwchradd. Maent yn griw arbennig iawn ac rydym yn gwybod y byddant yn gwneud yn gampus yn Ysgol Llangefni. Amdani a mwynhewch!

Gwobrau chwaraeon Gwynedd a Môn

Rydym yn andros o falch o’r ffaith fod Ysgol Henblas wedi cael yr ail wobr yng ngwobrau chwaraeon Gwynedd a Môn wythnos diwethaf. Mae hyn yn dipyn o gamp ac yn adlewyrchiad o’r holl weithgarwch sydd wedi digwydd ym maes addysg gorfforol dros y flwyddyn ddiwethaf. Llongyfarchiadau mawr i bawb a diolch i’r holl bobl sydd wedi helpu i sicrhau fod plant yr ysgol yn cael y profiadau niferus hyn.

Prynhawn prysur

Diolch i’r grwp iach a blwyddyn 6 am drefnu prynhawn o weithgareddau ffitrwydd a chadw’n iach ar gae’r ysgol. Roedd pedair gweithgaredd yn cylchdroi a’r plant yn gweithio’n egniol ymhob gorsaf.

Talent Henblas

Gan fod cymaint o dalentau yn Ysgol Henblas penderfynodd y cyngor ysgol drefnu bore arbennig yn rhoi cyfle i holl blant yr ysgol arddangos eu talentau – dawnsio, gymnasteg, canu, actio a mwy. Roedd pawb yn wych a llongyfarchiadau i Jasmine a Sion Gwilym am gael y nifer mwyaf o bleidleisiau yn y cyfnod sylfaen a’r adran iau.

Jac Jones

Croesawyd y dylunydd Jac Jones i’r ysgol at ddisgyblion blynyddoedd 3 a 4 gan eu bod wedi bod yn darllen y nofel Diwrnod Ofnadwy gan Haf Llewelyn. Jac Jones oedd wedi dylunio’r lluniau yn y nofel ac fe ddangosodd i’r plant sut y mae’n mynd ati i greu darluniau ar gyfer llyfrau o’r fath. Cafwyd bore bendigedig yn ei gwmni a’r plant wrth eu boddau yn rhyfeddu at ei sgiliau arlunio.

Pobl sy’n helpu – Anti Julie

Hoffai blwyddyn derbyn ac un ddiolch yn fawr iawn i Anti Julie am ddod atom fel rhan o’n gwaith ar y thema ‘Swyddi- Pobl sy’n helpu’. Roedd y plant wedi paratoi amryw o gwestiynau, a dysgu sut i ddefnyddio llawer o offer meddygol. Cafodd pawb hwyl yn dysgu am swydd bwysig nyrs. Diolch i Anti Julie am roi ei hamser.

Ffarwelio

Rydym yn diolch yn fawr iawn ac yn hynod werthfawrogol o gyfraniad dwy aelod o staff sydd wedi ein gadael sef Miss Ceri Roberts a Miss Medwen Humphreys. Rydym yn ddiolchgar tu hwnt i’r ddwy am eu gwasanaeth arbennig yn Ysgol Henblas ac am roi profiadau gwerthfawr i’r plant. Rydym yn dymuno yn dda i Anti Ceri yn Ysgol Bodedern ac i Miss Humphreys yn Ysgol Brynsiencyn.

Croeso yn ôl!

Ar ddechrau blwyddyn newydd rydym yn croesawu’r plant yn gynnes yn ôl i Ysgol Henblas. Mae’r disgyblion yn nosbarth derbyn Mrs Roberts wedi hen setlo bellach ac yn mwynhau eu dyddiau cynnar yn yr ysgol!

Mabolgampau/ffair haf

Un o uchafbwyntiau’r flwyddyn yn Ysgol Henblas yw diwrnod y mabolgampau, ac eleni eto fe gafwyd prynhawn bendigedig. O’r criw ieuengaf yn y cylch meithrin i'r disgyblion hynaf ym mlwyddyn 6 cafwyd hwyl a bwrlwm wrth i bawb gystadlu yn frwdfrydig yn enw’r ddau dim Cybi a Seiriol. O drwch blewyn Cybi aeth a’r gwpan eleni. Diolch i’r rhieni am gefnogi ac yn ogystal am gymryd rhan yn y rasus ar ddiweddny prynhawn. Yn dilyn y mabolgampau fe gafwyd y ffair haf a llawer o stondinau amrywiol i ddiddanu’r plant a’r rhieni. Diolch i bwyllgor egniol y gymdeithas rhieni/athrawon am drefnu’r holl brynhawn. Llwyddwyd i godi swm bendigedig o £700.

Bethan Wyn Jones

Daeth y naturiaethwraig Bethan Wyn Jones i siarad gyda disgyblion blynyddoedd 5 a 6 am gynefinoedd Ynys Môn. Roedd y plant wedi paratoi rhestr o gwestiynau a rei chyfer ac fe gafwyd atebion i’r cwbl gan Bethan. Roedd yn wych dysgu termau cywir am blanhigion, adar ac anifeiliaid sydd i’w darganfod ar yr ynys. Diolch yn fawr iawn Bethan am brynhawn i’w gofio.

Bad achub

Bu’r Cyfnod Sylfaen yn ymweld a Bad Achub Moelfre yr hanner tymor yma er mwyn dysgu am swyddi’r rhai sy’n achub bywydau. Cafwyd ymweliad gwerth chweil, a’r plant yn gwirioni mynd ar y gwch fawr newydd o’r enw Kiwi a gweld Enfys y gwch fach. Yn dilyn yr ymweliad aeth y plant i gael picnic ac am dro i’r traeth gan gael hufen iâ blasus o Parlwr Hufen iâ Moelfre. Diolch yn fawr i Paul Roberts am dalu i bawb gael hufen iâ.

Halen Môn

Aeth disgyblion blwyddyn 2 i ymweld a Halen Môn er mwyn dysgu am y broses o gael halen o’r môr. Cafodd y disgyblion lawer iawn o hwyl yn cymharu halen a hidlo dwr yn y gweithdai amrywiol yn ogystal ag ymweld a’r ffatri gynhyrchu. Roedd y plant wedi rhyfeddu gyda’r broses a bod posib gwneud busnes wrth ddefnyddio adnodd sydd mor hygyrch i ni fel pobl sy’n byw ar yr ynys.

Royal Charter/Canolfan Copr Amlwch

Aeth disgyblion blynyddoedd 5 a 6 i Moelfre i ddysgu am hanes y Royal Charter. Yn disgwyl amdanynt yn y capel oedd y Parchedig Huw John Hughes a roddodd gefndir y llong cyn ei llongddrylliad drasig. Fe welodd y plant leoliad y suddo yn ogystal a gwerthfawrogi prydferthwch arfordir Môn. Diolch i Mr Hughes am fore bythgofiadwy. Ar ôl cinio aeth pawb ar y bws i Ganolfan Copr Amlwch i ddysgu am y diwydiant copr ym mynydd Parys a phwysigrwydd Porth Amlwch yn ei ddydd er mwyn allforio’r copr i weddill y byd. Mae Porth Amlwch a’r Ganolfan yn fendigedig – ewch yno os cewch gyfle yr haf yma.

Haf Llywelyn

Mae disgyblion blynyddoedd 3 a 4 wedi bod yn astudio ‘Diwrnod Ofnadwy’ gan Haf Llywelyn ac yn ddiweddar fe ddaeth yr awdures i’r ysgol i drafod ei llyfr a’r hyn oedd wedi ei chymell i ysgrifennu’r nofel. Roedd y plant wedi paratoi cwestiynau addas ac fe gafwyd awr ddifyr yng nghwmni Haf. Diolch yn fawr iawn iddi am ei amser unwaith eto yn cyfoethogi addysg plant Ysgol Henblas.

Twrnament rygbi

Llongyfarchiadau i dim rygbi blwyddyn 3 a 4 a thim 5 a 6 am roi perfformiadau da iawn yn nhwrnament yr ynys gynhaliwyd ar gaeau clwb rygbi Llangefni. Diolch i Mrs Sue Legge a Mrs Eleri Stephen ac i’r rhieni am gefnogi.

Canolfan Thomas Telford

Aeth disgyblion blynyddoedd 5 a 6 i Ganolfan Thomas Telford Porthaethwy i ddysgu am hanes y ddwy bont sy’n croesi’r afon Fenai a strwythurau pontydd yn gyffredinol. Ar ddiwrnod heulog o Fehefin roedd cerdded dros bont Menai yn brofiad bendigedig. Bu’r disggyblion wrthi yn adeiladu pontydd eu hunain ac fe lwyddodd pont pob grwp i gynnal y pwysau a roddwyd arnynt. Da iawn bawb a diolch i staff y ganolfan am eu hamser.

Mabolgampau sir yr Urdd

Bu cystadlu brwd ym mabolgampau rhanbarth yr Urdd yn dilyn llwyddiant y cylch. Da iawn bawb am roi o’u gorau. Llongyfarchiadau i’r canlynol ar eu llwyddiant pellach:
Naid hir bl 5 a 6 1af Gruff Parry
Taflu pel bl 3 a 4 1af Sion Stuart
Ras unigol 600m bl 5 a 6 1af Gruff Parry
Taflu pel bl 3 a 4 2il Sara Coyne

Cydymdeimlo

Fel ysgol a chymuned rydym yn anfon ein cydymdeimladau dwysaf a Ms Carol Jones neu Anti Carol fel mae’r plant yn ei galw yn ei phrofedigaeth o golli ei mam. Rydym i gyd yn meddwl amdanoch Carol yn eich colled.

Edward Morus Jones

Ew – son am forio canu oedd i’w glywed yn Ysgol Henblas ddechrau Mehefin.Braf iawn oedd cael croesawu Mr Edward Morus Jones i'r ysgol am brynhawn bendigedig o ganu a morio. Rydym bob tro yn falch o groesawu Mr Jones i Ysgol Henblas ac mae ei frwdfrydedd heintus yn ysbrydoli'r plant bob tro. Edrychwn ymlaen i'w groesawu eto yn fuan!

Ffair Haf

Cliciwch yma i weld holl luniau'r Ffair Haf yn dilyn ein mabolgampau campus. Diolch i bawb am gefnogi ac i'r tim egniol am drefnu mor effeithiol.

Edward Morus Jones

Plant Ysgol Henblas yn morio gyda Mr Edward Morus Jones. Hwyl a sbri!! Cliciwch yma i weld y lluniau a'r fideo

Ffair Wanwyn

Cafwyd noson hyfryd o gymdeithasu ddechrau Mai yn ffair wanwyn yr ysgol. Roedd y Neuadd yn orlawn a’r caeau yn fwrlwm. Diolch i bawb fu’n cynnal y stondinau amrywiol a’r gweithgareddau chwaraeon ar y cae, y perfformiadau cerddorol bendigedig gan aelodau’r adran yn ogystal a’r bwyd blasus yn y gegin. Cliciwch yma i weld y lluniau

Aberystwyth

Rydym yn falch iawn o’r tim pel-rwyd a’r tim pel-droed fu’n cynrychioli’r adran ym mhenwythnos chwaraeon cenedlaethol yr Urdd. Roedd canmol mawr i berfformiadau’r timau dros y ddau ddiwrnod a phawb wedi cael hwyl a mwynhad wrth roi eu gorau glas. Diolch i bawb fu’n cefnogi ac yn arbennig i Eleri Stephen a Barry Edwards am eu holl waith hyfforddi.

Big Pedal

Daeth rhagor o newyddion da i’r ysgol – Ysgol Henblas oedd yn drydydd drwy Gymru yn ystod pythefnos y Big Pedal. Tipyn o gamp a da iawn bawb am gefnogi a bod mor egniol.

Mabolgampau’r Urdd

Llongyfarchiadau mawr i’r holl blant fu wrthi yn cystadlu ym mabolgampau cylch yr Urdd nôs Fawrth. Daeth llwyddiannau lu mewn llawer o gystadlaethau ac rydym yn dymuno yn dda i’r plant fydd yn cystadlu yng nghystadleuaeth y rhanbarth. Da iawn bawb a diolch i Siwan Gwilym am ei holl waith trefnu.

Llwybr Celf a Hamdden Llangristiolus

Yn haul mis Mai braf oedd cyfarfod Mr Rhun ap Iorwerth AC wrth lansio llwybr celf a hamdden drwy’r pentref. Ewch i weld gwaith celf y plant ger Neuadd yr Henoed, ac yna am dro ar hyd y llwybr. Cliciwch yma i weld mwy o luniau

Ymweliadau

Rydym yn ffodus o gael llawer o ymwelwyr diddorol yn rhoi profiadau arbennig i’r plant. Mae’r Prifardd Cen Williams wedi bod yn barddoni gyda disgyblion blwyddyn 5 a 6. Mae Mr Emlyn Wlliams yn ymweld yn bythefnosol i roi gwasanaethau i blant yr holl ysgol. Yn ogystal mae PC Owain wedi rhoi gwybodaeth bwysig i’r holl blant am ddiogelwch ar y we.

Ardal allanol

Dyma i chi blant ymroddgar – ac yn gweithio ar ddydd Sadwrn. A'u rhieni! Rydym yn ddiolchgar iawn i bawb sydd wedi helpu i drawsnewid ardal allanol y cyfnod Sylfaen. Mae’r plant wedi bod yn brysur yn plannu letys, pys, ffa, broccoli, perlysiau a blodau yn eu gardd newydd. Diolch yn fawr iawn i Michael Allen ac Anti Nia am y rhoddion.

Ffitrwydd ac athletau

Unwaith eto rydym yn ffodus fod y plant yn Ysgol Henblas yn cael hyfforddiant gweithgareddau addysg gorfforol gan Barry Edwards. Mae’r plant wrth eu boddau yn gweithio’n egniol ar fore dydd Gwener ac yn cael blas ar yr holl weithgareddau. Diolch Barry.

Gwellhad buan

Rydym yn dymuno gwellhad buan i Anti Dianne sydd yn gwella yn dilyn llawdriniaeth yn ddiweddar, ac yn falch ei bod yn cryfhau. Brysiwch wella!

Beicio i’r ysgol

Yn ystod wythnos olaf Ebrill ac wythnos gyntaf mis Mai rydym ni yn Ysgol Henblas yn cymryd rhan yn her “Big Pedal” 2018. Bob diwrnod mae plant, rhieni ac aelodau o’r staff yn cael eu hannog i feicio, sgwtro neu gerdded i’r ysgol. Mae dalgylch Ysgol Henblas yn eang ac mae’n ardal wledig. Golyga hyn bod rhai plant yn gorfod teithio hyd at 2-3 milltir bob dydd ac eraill yn gorfod dringo elltydd serth sydd yn ymdrech fawr iawn. Ar ddiwrnod olaf yr her rydym yn cael gwisgo fel ein harcharwyr. Y flwyddyn diwaethaf daeth yr ysgol yn ail drwy Gymru yn y gystadelaeth ac rydym yn gobeithio gwneud yn well eleni.

Kerbcraft

Ac nid yn unig beicio neu sgwtera i’r ysgol sydd yn digwydd – mae plant blwyddyn 1 wedi bod yn cael gwersi er mwyn croesi lôn yn ddiogel gan edrych o ochr i ochr i wneud yn siwr nad oes cerbyd yn dod. Wrth wrando yn ofalus a cherdded mewn parau mae’r plant wedi datblygu sgiliau pwysig. Da iawn chi blant blwyddyn 1.

Llwyddiant yr Urdd

Rydym yn falch iawn o’n holl ddisgyblion fu’n cystadlu yn Eisteddfod yr Urdd cyn gwyliau’r Pasg. Diolchwn yn fawr iawn i bawb fu ynghlwm a’r hyfforddi ac wrth gwrs i’r holl blant am roi o’u gorau. Dymunwn yn dda yn awr i Greta (unawd chwythbrennau), Eluned (unawd cerdd dant blwyddyn 3 a 4) a’r Parti Adran Unsain fydd yn teithio i’r Eisteddfod Genedlaethol ddiwedd mis Mai. Pob hwyl i chi a llongyfarchiadau mawr ar eich llwyddiant!

Taith Melin Llynnon

Aeth disgyblion blwyddyn 3 a 4 ar ymweliad i Din Lligwy a Melin Llynnon fel rhan o’u gwaith yn astudio Oes y Celtiaid. Cawsont weld adfeilion hen bentref o’r cyfnod cyn mynd ymlaen i weld atgynhyrchiad o dy crwn. Cafodd y plant fwynhad o wrando ar Ash yn siarad am fywyd y Celtiaid gan geisio cynnau tân a chreu crochenwaith o glai.

Ardal allanol

Mae’n hyfryd gweld ardal allanal y Cyfnod Sylfaen wedi trawsnewid dros yr wythnosau diwethaf. Diolch i’r holl rieni sydd wedi bod wrthi yn gwirfoddoli ac wedi darparu adnoddau ac offer. Yn ogystal, diolch i’r plant fu wrthi yn weithgar a hynny yn ystod gwyliau’r Pasg. Bellach mae cegin fwd, byd mawr ac ardal dywod ar waith ac mae’r plant wrth eu boddau yn dysgu trwy chwarae yno.

Cystadlaethau Celf a Chrefft yr Urdd

Llongyfarchiadau mawr i blant Adran yr Urdd ar eu llwyddiant arbennig yn y cystadlaethau Celf a Chrefft eleni. Daeth pedair gwbr gyntaf, dwy ail wobr a dwy drydydd wobr i’r ysgol. Gwych!

Eisteddfota!

Llongyfarchiadau i bawb fu'n cystadlu yn yr Eisteddfod ddydd Sadwrn diwethaf. Bu'n ddiwrnod llwyddiannus dros ben gyda'r Adran yn cipio'r darian eto eleni.Mawr ddiolch i Mrs Keen a Mrs Roberts am eu gwaith caled a hei lwc yn yr Eisteddfod Sir ar Mawrth 21ain.

Llwyddiant I’r Côr

Llongyfarchiadau i gôr Ysgol Henblas ar eu llwyddiant yng nghystadleuaeth Côr Mawl, 2014 a gynhaliwyd yng Nghapel Mawr, Porthaethwy ar Hydref 19eg. Bu i’r côr ennill y gystadleuaeth gan dderbyn cwpan a siec o £350 i’r ysgol. Diolch i’r arweinyddes, Mrs Kelly Owen, ac i’r cyfeilyddion, Mrs Bethan Roberts, piano; Mrs Bryony Mundy, ffliwt; Mrs Lois Roberts a Mrs Mair Eleri Jones, ffidil. Diolch yn fawr hefyd i Mr Edward Morus Jones am ei gyfieithiad arbennig ar gyfer un o ganeuon y côr sef ‘Y Fflam’. Ond yn fwy na dim, diolch i’r plant am eu gwaith called ac am ganu’n fendigedig ar y diwrnod. Da iawn chi!

Llysgenhadon Addysg Gorfforol

Llongyfarchiadau i Osian Iorwerth ac Elin Rowlands ar gael eu dewis i fod yn Lysgenhadon Ifanc Addysg Gorfforol yr ysgol am eleni. Maent wedi cael bore o hyfforddiant gyda staff yr Uned Datblygu Chwaraeon ym Mhlas Arthur ac wedi cael cyfle gyd-drafod a rhannu syniadau gyda Llysgenhadon o ysgolion eraill y Sir.

Y Ffram Ddringo!

Dyna gyffro oedd yn yr ysgol pan ddychwelodd y plant i’r ysgol ar ol hanner tymor i weld bod ffram ddringo wedi ymddangos ar eu cae chwarae! Y farn gyffredinol yw ei fod o’n “Cŵl”!

Y Goeden Hapus – Mis Hydref

Dyma’r disgyblion gafodd eu hanwebu i fod ar y Goeden Hapus ym mis Hydref.

Plant Mewn Angen

Bu bwrlwm garw yn yr ysgol dydd Gwener, Tachwedd 14eg pan fu’r plant yn codi arian i ymgyrch Plant Mewn Angen. Y Cyngor Ysgol oedd yn gyfrifol am drefnu’r gweithgareddau. Cafodd pawb andros o hwyl a chodwyd cyfanswm ardderchog o £392-29. Da iawn bawb!

MMM! Cacenau blasus!